The Mist 霧地異煞
Steve King 原著小說, 講述一個小鎮突然出現濃霧及怪獸, 一班被困係超市裡面既人所發生的故事, 戲不在於咩特技 (其實裡頭既CG頗爛….), 反而係講述人性既表現令我更深刻, 當時所有既通訊都中斷, 而一部份人情緒開始不穩定, 更有一名宗教狂熱者不時發表 末日論, 男主角等人情願離開都不想再留下, 當時就曾經講過一句 – 佢相信人性本來係善良, 但當一切文明消失之後, 人性就變得唔可靠. 呢句說話令我非常深刻, 相信亦都係全套戲既主旨。
觀後感 : 怪物其實很簡單, 牠們主要找人來做食量。人, 卻可以很可怕, 往往為咗自己, 可以講一大堆說話, 來將自己所做既壞事, 變成造福人群既事情。好似之前既香港小學生造炸藥事件, 其校長居然話佢係天才, 簡直豈有此理 !
欣賞媒體 : DVD
Wall-E 太空奇兵
Pixel 一年一度作品, 以環保為題材, 非常精彩, 但明顯, 電影根本唔係以小朋友觀眾, 而係成年人, 小朋友要大人花好大唇舌先會明白。唔明一啲香港影評人 or 觀眾只係針對話小對白, 好悶, 何解你地對王家衛啲戲又會催之若驚 ?
我唔係祟洋, 但人地用咗好多特別手法表達故事, 冇錯, 主角機械人係完全冇對白, 但製作人以周遭環境, 設備來說故事, 好似用一啲大廈外牆電視講述人類為何離開地球, 一啲過去既 video 影像交待等等, 呢啲唔係電影對白嗎 ? 一定要出自主角口中才是對白 ??
觀後感 : 好明顯 Pixel 公司已經有好大話事權同自由度, 如果唔係老板們一定唔會比佢地製作呢套戲, 希望可以一路保持呢種自由度, 題材先會多元化。
我相信好多觀眾心態(主要係小朋友)都係睇完之後大叫不滿, 注意呢套不折不扣係比大人睇既卡通片, 點解所有卡通片一定要打造成小朋友專利 ? 大人既卡通片就只有色情暴力 !?
P.S. Blu-ray 超正 ! 且有好多特別收錄 !
欣賞媒體 : 戲院, Blu-ray
Wanted (殺神特工)
最初都抱不大期望, 因為此俄羅斯導演之前既作品守夜神 Night Watch不太合本人口味, 守日神 Day Watch 更冇睇過, 但當此導演拍上荷利活之後似乎有不錯既化學作用, 影像非常凌厲, 所有事情, 一個字形容 – 型 ! 會轉彎既子彈真係諗都無諗過…..
觀後感 : 睇完此電影之後第一個感覺係電視遊戲Devil May Cry !! 如果要電影化, 請由這位導演操刀, 唔該 !
欣賞媒體 : Blu-ray
我唔係咁崇洋只睇西片既, 去年都有幾套我喜歡既港產片 –
一個好爸爸
張艾嘉導演加上古天樂同劉若英, 古劉二人前作’生日快樂’非常合拍, 非常不錯。反而張艾嘉比我感覺意料之外, 睇之前仲有啲驚會好悶…..
欣賞媒體 : 戲院
文雀
好多人話唔好, 但我又覺得幾好睇, 意境同表達手法係有啲另類, 有人可能覺得悶, 不過唔覺得好大問題, 唔係啲戲有強烈聲效, 大場面先叫好戲, 好似赤壁真係不敢恭稚……
個人很喜歡盧海鵬戲中表現, 原來佢都可以好奸, 真係老戲骨 ! 不過戲中最後一段係上環既觀塘卓球室就真係有啲突兀….
欣賞媒體 : 戲院
証人
最近金像獎前剛剛看 DVD, 發現真係唔錯, 最後一幕劇情串聯整個故事, 真係一流 ! 其實我覺得謝霆峰表現更出色, 至少冇咗以前既作狀同浮誇。好睇 !
欣賞媒體 : DVD
葉問
原來係08年出品, 唔使講, 我要打十個 ! 我一定唔會睇王家衛版本 !!
欣賞媒體 : Blu-ray
09年暫時好似未有咩特出既電影, 等緊 Transformer 2 ! Terminator 4 ! Let's See ^_^
0 comments:
Post a Comment